Exodus 16
1E aveti lu te huram xa latemea reling hal Isip en, mol-Isrel xil mei lateti e ut Alim. Di, e melengien lim e le tei (15) teni, xil lamea reling rute ak, e lakakao ba lastal e uruvuol tahal 'Saen' xa de hilaep te Alim e Vathu Senae. 2E rute ak, xil vus lasep utut ni Mosis xal Eron labit, 3“Vahos mak mu vahit Iahova vahas vin xamem tuei e hal Isip vengan xa inggaxor makila mava hisi te vongoro xil vatel anien sav xil holu mun. ?!Veneh ma muleh xamem mamei e uruvuol ak tengan mae vakar vin xamem en!?4Iahova biteni mi Mosis bit, “Xosali, nipol ni anien ikiri imei etan ixoni us xa mus nggo tilang hat imei tengan mua ni. E melengien xil ngasen, moletin xil ha lileh viton ni ipin ni melengien tei takes. Ixo suse ak, inou nisak pis xil tengan nipus ti xa xil ti lihusil xat sepinien navan mu linahusil xati ti.
11Di, Iahova biteni mun mi Mosis bit, 12“Inou nalong hilesuten na mol-Isrel xil. Ma ha uhiteni mi xil xa xosali mahis, xil lia kovi. Ti, e makoe, xil lia vin xil ni beret. Imak, ma xil likila sung xa inou nabe Iahova, Hi nae.”
13E mahis nen tak, tuman xil xa lakesi ni 'kuel' mei lase sein rute xil ngasen, ma moletin xil ba labas xil e ba langga vin xil ni. E makoe nen, ut xil vus memer ni nin te vongien. 14Melele xa eai ngga xat rute xil ak bue, xil lapus nin xil ak mei mieh e mehin, nggoni neta tei xa mengor. Neta xil ak di e rute xil vus. 15Melele xa mol-Isrel xil lapusi, xil lale rasi ma di lasis xil mun tang nggo sepinien nae labit, “?Manna?” xa koute teni be “?Naha xiak?”
Mosis biteni mi xil bit, “Ngan ak be anien xa Iahova misa ni mi xamim tengan mua ni. 16Iahova misemae ni tengan muse kap ihe lu ihe a moletin tei. Muleh viton ni ipin ni naha xa ngan xil e tim samim xil likila lia ni e melengien tei takes.”
17Ma moletin xil lapol ni nggoni ngan xa tehiteni: rute xil lalehi holu e rute xil lalehi vuteili tang. 18E melele xa labuli kap nen xil, ngan xil xa lalehi holu lapusi pipin ni moletin xil e tim sae, e ngan xil xa lalehi vuteili tang, xil mun lapusi pipin ni xil. Mak, ma xil vus anien ae pipin. 19Mosis biteni mi xil bit, “Munaserep ti natuxoh makoe.” 20E rut moletin xil latalong xat ti Mosis e laserev rut anien ak di. E makoe nen, lapusi xa manna xil ak, ui xil lastal langgo en e labo. E melele xa Mosis pusi mak, xi ien minggat xil. 21E makoe xil ngasen, moletin xil vus laba di laleh viton ae xil pipin ni ngan xil xa ladi tim sae. E melele xa eai nggan nggeih e ut mitin, rut manna xa di e tan mileh e mikesae.
22E melengien tei he sav (6) te wik ak, xil laleh manna pipin ni melengien lu, kap hat a moletin tei. E melele xa eilep xil te vatimol xil lamei tengan lavit mesen ni mi Mosis, 23xi biteni mi xil bit, “Hi misemae ni xa visuvong ihe Sabat nan, melengien eo te ngelen. Mak, ma xosali, naha xa muhit mua ni, mukila muhule mu mukuk ni ixoni ngan xa iemim bei. E rut manna xa di, mukila muserevi ituxoh makoe.” 24Ma nggoni ngan xa Mosis biteni mi xil, xil laserev rut manna ae di. E makoe nen, lapusi xa tasa ti, ui xil latastal ti en. 25Ma Mosis biteni mi xil bit, “Anien xil xai te xosali, vengan xa be Sabat na Iahova, melengien eo te ngengelen. Ma xosali, musakras mukamet ti manna e valkesao xil ak. 26E melengien xa be tei e he sav (6) te wik xil ngasen, ha muleh viton anien amim. E melengien lu e he sav nen (7) be Sabat, e xamim musakras mukamet anien xil ak en.”
27Tave ti neta xa Mosis biteni mak, e rut moletin xil laba e Sabat tengan laleh viton anien en, e latakamet ti. 28Misak ni, Iahova biteni mi Mosis bit, “?Xamim ti musin sepinien e rae xil navan ha ituxoh vilieh? 29?Mupusi? Inou, Iahova, nasa melengien tei te ngengelen mi xamim. Ve rin ak, e melengien xil vus xa be tei e he sav (6) te wik, inou di nasa anien amim pipin te melengien lu. E melengien xa be lu e he sav (7) te wik xil vus, moletin xil vus liti kat e vonine, munahe reling tim samim ti.” 30Misak ni, moletin xil latapol ti e melengien xa be lu e he sav (7). 31Mol-Isrel xil lakes anien ak ni 'manna'. Xi nggoni utiei tei xa mieh e langga ni mikas nggoni kek xa hani di en.
Copyright information for
TVK